الأحد، 15 أكتوبر 2017

مقاييس نجاح المصالحة، زوايا متعددة - د.رياض عبدالكريم عواد

مقاييس نجاح المصالحة، زوايا متعددة 
د.رياض عبدالكريم عواد
مقاييس متعددة ومتناقضة
تبدأ بامنيات موظفي حكومة غزة بالوظيفة والدرجة والمرتب
وامنيات موظفي غزة الشرعيين بالرجوع إلى الوظيفة والمنصب وبمرتب كامل...

موظفي غزة بدهم حقوقهم إللى حرمتهم منها حكومتهم 11 خريفا، وما قالوش بم....اخذوا اراضي حكومية وباعوها.....حقهم يطالبوا بحقوقهم
موظفي الشرعية خايفين من التقاعد المبكر، حقهم
بدهم الخصومات 30%، مين بقدر يقول هذا مش حقهم
بدهم ترقياتهم ورتبهم وعلاواتهم ومساواتهم بزملائهم في الضفة الغربية، والله حقهم
كلكم إخوة وأبناء وطن واحد لكم فيه حقوقا متساوية بالعدل والقانون
لكن القضية مش قضية موظفين وبس، والله كأنه البلد فش فيها الا الموظفين ومشاكلهم؟!
وطيب وخريجي 11 خريفا
والعشر أجيال اللي تدمروا، إيش نقول لهم
والعمال اللي منعتوهم يشتغلوا في اسرائيل، 70 الف عامل، إيش حقوقهم
والبطالة والمرضى النفسيين والمجانين والغلابة والشؤون الاجتماعية، والاسرى، والعلاج بالخارج، والمعابر، والمزارعين المدمرين والبيوت المهدمة والبحر الملوث والمجاري والكهرباء والميه والارض المنهوبة و # تل_السكن اللي بنادي عليكم ولا حد مجيب
كله بده حقه، حقه
على هيك المصالحة بدها ترين مليان مصاري
الكل بده حقه، معاه حق
الكل مستعجل، يا بناخذ حقوقنا يا فش مصالحة
طيب هو الموضوع من اصله إيش كان، مكانش فيه مشكلة موظفين
لما حماس قامت بانقلابها أو حسمها، سميه زي ما بدك
قامت عشان الأمن والمقاومة والوطن والتحرير، وفي الاخر كله بح... .بح!!!
والموظفين لما استجابوا لقرار حكومتهم وقيادتهم استجابوا لانهم ملتزمين بشرعيتهم
لا كان فيه مشكلة وظائف ولا موظفين، والحكومة حافظت علينا بالحد المعقول
إيش اللي صار
المصالحة يا جماعة هدفها ترجع غزة إلى حضن الشرعية
عشان نتوحد في وجه إسرائيل وفي وجه الاستحقاقات القادمة
وعشان تصلح دمار شامل مدته 11 سنة تحولت غزة فيها إلى مكان لا يصلح فيها الحياة
قد تعترض على إجراءات السلطة من أجل أن تضغط على حماس للذهاب الى المصالحة، هذا حقك، ولكنك يجب أن تثق أن السلطة كان هذا خيارها المجبرة عليه بعد ان انعدمت واستنفدت كل الوسائل
كما انه كان احد الأسباب التي دفعت قادة حماس المخلصين للمصالحة من الذهاب في هذا الاتجاه بعد ان كان البعض الاخر يشكك في قيمة ما تدفعه السلطة من موازنتها إلى القطاع ومن نزاهة مصادر هذه الاموال، ما تنسوش دايتون؟!
بل أن بعضهم يطالب قيادته الان بالتخلي عن البلديات لانهم غير قادرين على الصرف عليها ولأنها تسبب تآكل شعبيتهم حين يتصدون للجباية من الناس، كله على ظهر السلطة، حمالة الاسايا!!!
مش مهم، كله بتصلح، انتظروا أن تتمكن الحكومة وتكون صاحبة قرار
كله بنحل بالصبر وطولة البال
واللي صبرنا مخموجين 11 عام يخلينا نصبر كم شهر
لا تنسوا هدف المصالحة الحقيقي
لا تنسوا أن الحمل ثقيل،
مشاكل غزة كثيرة ومتلتلة ومعقدة والكل معاه حق.
لكن بالوحدة والتضامن اللي بغيناه يكون ..يكون،
اكيد ان انتظارات المواطن طويلة و ثقيلة تبدأ من الكهرباء و تنتهي عند التحرر و الاستقلال الوطني مرورا بالرواتب والمعابر ومحاربة الفساد و تحقيق الامن بمعناه الشامل السياسي و الاجتماعي .
والمعادلة تتعلق بطرفين: الشعب والسلطة، على الشعب الوعي بالإكراهات قدر وعيه بالطموحات. وعلى السطة ان تعرف كيف ترتب الطموحات و توجه النضالات في اتجاه مزيد من الوحدة و التلاحم . ولنا في معركة الاقصى الاخيرة دلالات و عبر و في المصالحة حكم و مواعظ وفي #تل_السكن امثلة حية على تلاحم الشعب بالقيادة ....المطالب واحدة و الغايات واحدة، الاختلاف فقط في ترتيب الاولويات .

في الختام، لا تنسوا ان هناك من يتربص بوحدة شعبكم وبسلطتكم الوطنية، يحمل عصا بين يديه، جاهز للتعطيل والتخريب، واسرائيل ليس عن ذلك ببعيد؟!
هناك من يشكك مستغلا حاجتكم
هناك من يهدم باسم النقد والانتقاد الممجوج
هناك من لا يعيشون الا على الفرقة والدمار، لا تصدقوهم
لا تهمزوا ولا تغمزوا من سلطتكم ولا تهددوها، عيب هيك على صحاب البيت ، ولاد السلطة اللي بنوها وضحوا من اجلها؟! إيش رايكم
احذروا
دافعوا عن سلطتكم الوطنية
لا تتطيروا....

ليست هناك تعليقات: