لسه خايفه ... ؟!
 |
| الأديبة عزة راجح |
لسه خايفه ... ؟!
لابسه ليه توب الأنينْ
لسه ليه قلبكْ حزينْ
لسه ليه العين بتبكي
والأمل ... خالي الإدينْ ؟!
خايفه ... ؟!
قولي ما انتِ شايفه
قولي .. وحدك بينا عارفه
إننا عاشقين ترابكْ
كلنا ... حراسْ شبابكْ
ما الحياه إنتِ .. وغرامكْ
وعدْ ... مكتوبْ ع الجبينْ
خايفه .... ؟!
أيه جواكِ .. قولي
اكسري خوفِكْ .... وثوري
زعَّقي فينا وقلبكْ
افتحيه ... وعلينا شوري
قولي مين عايزاه دليلكْ
مين حلمتي بيه في ليلكْ
فوق حصان أبيضْ يجيلكْ
يا اللي فرسان البريه
يحلموا يموتوا ف سبيلكْ
خايفه ... ؟!
لسه خايفه .... ؟!
اخلعي توبْ الأنينْ
دا انتِ نور العالمينْ
وانتِ عطر الدنيا .. وانتِ
دُرهْ .. فوق دهر السنينْ
اخلعيه .. وارميه بعيدْ
بكره جي لك ألف عيدْ
افتحي الشبااك وطلي
وارسمي الحلم الجديدْ
ارفعي راسك وطلي
نجمه
بدر
وشمس تشرقْ
للحياه ... النور تِعيدْ
خايفه .... ؟!
لسه خايفه ......... ؟!
الأديبة عزة راجح
عضو اتحاد كتاب مصر
ليست هناك تعليقات:
إرسال تعليق